أيمن نور .... رئيساً

***************

كنت تعبان من كذا مشوار عملته ... فنمت وشوفت فى المنام بان الدكتور / أيمن نور نجح فى إنتخابات الرياسة وأصدر قرار بحل مجلس الشعب وإجراء إنتخابات جديدة .. وقد أصدر قرارا آخر بإستمرار عمل الحكومة الحالية لحين إنتهاء الإنتخابات وأوصى السادة المحافظين بالتنبيه على المواطنين بالدخول فى عضوية حزب الغد بالأمر وتمت الإنتخابات وكانت الأغلبية طبعاً لحزب الغد وشكل الحكومة الجديدة والتى عملت قوانين جديدة فى ظاهرها ديمقراطية وباطنها منع أى حد يتكلم أو يتنفس وإلا الحبس وأمر الرئيس أيمن نور مجلس الشعب بتغيير بعض مواد الدستور وتفصيلها بحيث توضع شروط تعجيزية لا تسمح بمناقشة الرئيس فى أية إنتخابات رياسة قادمة .

كما امر الحكومة بمحاولة فرض الحراسة على النقابات - وتمت الحراسة –وشوفت فى المنام ( اللهم أجعله خير ناس جايه من بعيد لابسة أبيض فى أبيض ومسكين يافطة مكتوب عليها نحن ضد الحراسة – خير إنشاء الله - ) .

كما شوفت فى المنام إيضاً ناس لابسة أسود فى أسود وبيضربوا الشعب اللى عامل مظاهرات بخصوص حريتهم – وأى حد يفتح بقة يترمى فى السجن فوراً ويتم تعذيبه وأمر الرئيس الجديد الحكومة بزيادة مرتبات الموظفين الغلابة كل سنة بشرط أن تقوم الحكومة بتحصيل هذه الزيادة وأكثر من الشعب قبل إعطائها للموظفين .

قمت من النوم مفزوعاً وقلت دى مش حلم دى كابوس – وقلت يارب لا تمكن أيمن نور ولا غيره من كرسى الرياسة لأنهم دول ناس أبناء مصر صحيح ولكن زى الإستعمار- ( يا عم أيمن سبنا فى حالنا إحنا عايشين دلوقتى فى رخاء وسعادة ) الأسعار رخيصة وفواتير الكهرباء والمياه والغاز والتليفونات أقل من زمان ومفيش دورس خصوصية للطلبة ومفيش بطالة ولا طوابير على العيش – وكل واحد من الشعب عنده عربية ودش وبوتاجاز بعشرين عين – والحياه حلوه لونها فوشية .

م/ احمد ممدوح