بشرى للحمير

===========

تخيلت حواراً بين حمارين بمناسبة اهتمام الحكومة بالحمير بعمل رقم قومى لهم .

· الحمار الأول : أبسط يا عم أخيراً الحكومة خدت بالها من الحمير وحتعمل لهم رقم قومى .

· الحمار الثانى : يا أخى حرام عليك الحكومة طول عمرها واخدة بالها مننا بس كانت مطنشة شوية .

· مطنشة ليه ، كانت مشغولة بمشاكل البنى آدمين ولما خلصت مشاكلهم ونجحت فى حلها إنتبهت لينا .

· شكلك كدة متابع تصرفات الحكومة .

· طبعاً متابع أمّال أنا بقيت حمار أزاى .

· بس واضح إنك فاهم : لازم تعرف أن فيه حمار فاهم وحمار مش فاهم .

· إيه الفرق بين الأثنين : الفاهم بيتعب شويه – واللى مش فاهم حيتعب كتير .

· انت هاتقولى فاهم ومش فاهم ياعم فى الآخر إحنا الأثنين حمير .

· إنت كده كل حاجة الحكومة تعملها مش عاجباك .

· و إنت كده كل حاجة الحكومة تعملها تصقف لها .

· أنا حر يا أخى : أنت هتضحك على نفسك ... هو فيه حمار حر .

· وأخيراً علينا أن نشكر الحكومة بالنيابة عن بقية الحمير .

م/ أحمد ممدوح