فهرس
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
متى نعيش احساس الشباب؟
انا (.............)
انا(..............)
مش مهم انا مين
لكن على العموم ان شاب من شباب هذا الجيل
الصاعد اللى ظهر فى منتصف تمانينيات القرن الماضى.
عمرى اللى لم يتعدى العشرين سنه بالرغم من
صغره الا انه مثلى كمثل الكثير من هذا الجيل الشاب اللى بيتوصف كثيرا بجيل السرعة
و التهور فى التصرفات.
منذ ان وعينا على هذه الحياه وجدنا مجتمع
منفتح عن قبل كده يعنى من خمسين سنة مثلا او اكتر زى ما سمعنا.
احيانا تستهوينى فكرة الكتابه عن كل ما
اراه امامى و البحث عن الجديد
احيانا اسرح بتفكيرى و احلامى لابعد
الحدود
ممكن يوصل التفكير ده لدرجة تشبه الجنون
و ما اقدرش افرغ الشحنة دى الا فى انى
اكتب و اكتب كل اللى فى بالى.
ممكن تتصفح كلامى تحس انك مليت منه لكن
يا ريت حاله الملل دى ما تجيش بدرى و لو جاتلك بدرى يا ريت تصبر عليا شوية و تكمل
سعادتك قرايه كلامى على اعتبار انى شخص (بيهيس) بكسر الباء و فتح الهاء و تسكين
السين .
وهو لفظ شبابى جديد بمعنى بيهلوس. ما
علينا خلينا نرجع لكلامنا....
تقدر تقول(خذوا الحكمه من افواه
المجانين) اذا اعتبرتنى مجنون.
لكن اذا حصل و ان سيادتك اخذت كلامى
بمحمل جد اكيد هاتحس انى صح نوعا ما و رايى ربما يكون الصواب.
انا فى البداية ما حبتش اذكر اسمى لانى
بصراحه مش بهتم بالمسميات لكن يهمنى هو ان فلان عمل كذا واضاف كذا او هو ايه؟ ونظرا لاننى حتى الان
مازلت طالب مغلوب على امره فانا حتى الان عالة على المجتمع و غير منتج فلا يهم ان
يعرف اسمى حتى اصبح شخص فعال يستطيع القول انا فلان . عملت كذا و كذا.
لكن اهم حاجة بتميزنى عن غيرى هى انى
باحاول افكر و اتامل فى احوالى و احوال الناس من حولى و يا ريت لو كل واحد يقدر
نعمة التفكير دى و يحاول يستفيد منها صح علشان ما يلفش و يدور كتير من غير فايده
فى حياته لكن المهم انى بافكر اذن انا موجود زى ما قالوا(انت تفكر ؟ اذن فانت
موجود)
ممكن تحس انى بتكلم كلام كبير قوى و تقول
انى باتكلم فى مواضيع اكبر من سنى لكن ارجع و اقولك هى دى طبيعة جيلى من الشباب .
يعنى مثلا هات طفل عنده عشر سنين من
الزمن الحالى و طفل تانى مثله وفى نفس سنه من خمسين سنه.... يمكن تلاقى الطفل
الاول يعرف عن اللى التانى كان عارفه و هو فى العشرين من عمره رغم انه لسه ما بلغش
عشر سنين و ده زى ما قلت لان الدنيا اتغيرت و العالم انفتح اكتر.
ده ما يمنعش انك تقول رايك فى كلامى بمنتهى الصراحة و لو فيه قصور او مبالغة فيه يا ريت توضحها لى
بدون حرج.
المهم انى طولت عليكم فى المقدمه الطويله دى و يا ريت
ندخل فى الموضوع الاساسى:-
قرانا كثيرا عن مشاكل الشباب من وجهة نظر
الكثير من الكتاب و المفكرين فى الصحف و غيرها.
و لكن هل سال احدنا نفسه؟
اين راى الشباب و مشاركتهم فى حل تلك
المشاكل؟ او اين الشباب الذى يستطيع ان يطرح مشاكله على المسؤولين لكى يساعدوه فى
حلها دون حرج او خوف؟
الشباب كما هو معروف ملىء بالطاقة و
الحيوية و الانطلاق و يبحث عن ما يستطيع ان يفرغ فيه تلك الشحنة و لكنه فى وقتنا
الحالى اصبح من الصعب ان يجد الشاب الشىء المفيد الذى يستطيع ان يفرغ من خلاله
طاقته ليفيد و يستفيد و لكنه ان وجد هذا الشىء المفيد قد يكون مكلف و غير قادر
عليه ماديا او اجتماعيا.
فماذا يفعل هذا الشاب بما داخله من طاقة
يظل يكتمها و يكبتها حتى يفجر تلك الحيوية و فى اتفه الامور واكثر الاعمال سطحية و
همجية و بالتالى نجد الشباب يسرق و ينحرف و يصل الى درجة القتل نتيجة لانه لم يجد
من يعلمه كيف يفكر و كيف يعمل طاقته.
و بعد هذا نجد الكتاب و المفكرين و
المجتمع يلوم الشاب و يطالب بمعاقبته لما وصل اليه من انحراف.
فنجد المجتمع يقول ان الشاب اصبح اكثر همجية و
تفاهة عن قبل و يفعل الشباب كذا و كذا دون
رادع كانه لا يجد من يحكمه.
و لكن هل وضع احد هؤلاء من الجيل القديم
الذى ينتقد الشباب نفسه فى خانة الشاب اى فى مكانه و زمانه و خاصة فى هذا الزمان
الذى اختلف عن زمنه السابق.
كل شىء اصبح اسهل و اكثر رفاهية
,كمبيوتر, انترنت, دش , انفتاح غير مسبوق على العالم , قنوات تليفزيونية لا تعد
تبهر الشباب و تطالبه باخراج طاقته و هو على الرغم من ذلك مغلوب على امره لا بيهش
و لا بينش لحد ما يوصل بيه الوضع الى انه ينفجر و يحاول يتمرد على وضعه و بالتالى
ده بينعكس عليه و كل من حوله , يبدا يهمل فى حياته و دراسته و يحاول يعيش سن ودور
اكبر من سنه او دوره, يبدا يفكر فى امور سابقه لوقتها بالنسبه ليه و لظروفه.
فى حين ان غيره من الناس الكبار السن من
الاجيال السابقة بتهاجمه و بتوصفه بالهمجية لكن نسيوا انهم وقت ما كانوا فى سنه
كان كل ما يمكن ان يرفه به احدهم على نفسه الراديو لو توفر له و يا سلام لو كان
مريش و واصل و عرف يشترى تليفزيون بيبث قناة واحده .يعنى اقصد ان وقتهم كانت
الحياه مش مرفهه زى الوقت الحالى
و بالتالى لم يجد الشاب فى
عصرهم ما يبهره و ينبش فى داخله لاخراج تلك الطاقة الكامنه فى ما لا يفيد سوى
الدراسة و العلم.
لكن المقصود من كده مش اننا نترك الشباب
و ما نلفتش نظرهم لعيوبهم لكن المطلوب هو اننا نسمع لهم و نسمع اراءهم عن سبب
تدهور اخلاقياتهم . و فى الغالب هايجاوبك الشاب اذا ناقشته فى حاجه زى دى بان
مشكلته هى الفراغ اللى بيعيش فيه هو و غالبية جيله.و الفراغ ده نشا من ايه غير من
الاسباب اللى ذكرتها فى البدايه .
لهذا نرجوا من المجتمع ان يفتح آذانه و
يصغى للشاب و يكسر حاجز الخوف و الحرج منه علشان يعرف يعرض مشاكله باسلوبه و
بالتالى تصل للمسؤولين من مصدرها فيكون
تاثيرها اكثر عمقا لاننا لو ما فكرناش فى مشاكل الشباب يبقى بالتالىمش هنفكر فى
مستقبل البلد اللى مرتبط بمستقبل شبابه.
و نحاول ننزل بعقولنا لعقولهم و نسمع منهم
بقلوبنا . و علشان نقدر نساعدهم وناخد بايدهم للسكة الصح و نشوف شباب يرفع من بلده
بدل من ان يجعلها تتدهور اكثر و اكثر........ اللهم احفظنا من التدهور.
لاننا لو فقدنا الشاب المصرى مش هنلاقى
مستقبلا اللى يحمى البلد و يخاف عليها لانه ما لقاش بلده بتخاف عليه و مش هنلاقى
مستقبلا شاب يساعد الاكبر منه لانه ما لقاش عنده اللى يساعده على خوض طريقه الصحيح
فى الحياه.
و للحديث بقية .....
بسم الله الرحمن الرحيم
احب ان ابدا كلامى بسؤال مهم: ( من هم اصحاب هذا البلد الذى نعيش فيه؟ )
سؤال بسيط لكنه كالسهل الممتنع اللى ممكن تلاقيله عشرات الاجوبة ... ناس تقول ان صحاب البلد دى
هم كل المصريين على ارضها ... و ناس تقول ان اصحاب البلد دى هم بعض الاثرياء من
اللى عندهم جاه و نفوذ و واخدين البلد دى زى ملكهم اللى ورثوه من اجدادهم و
بيتحكموا فى مجريات الامور فى البلد كلها..
. و فى ناس تانيه ليها راى تانى ان البلد
دى بقت مالهاش صاحب.... و من رايى ان
البلد دى فعلا المفروض انها ملك للمصريين كلهم لكن للاسف مع ان ده المفروض لكن
اللى امتلكها فعلا طائفة الاثرياء اللى ذكرتهم فى البداية ...
الدليل على ان مش المواطنين المصريين هما اصحاب
البلد فعليا حاجة واحدة ... خلونا نسال نفسنا سؤال واحد ( هل مش من المفروض ان مالك
الشيىء له حرية و حق التصرف فى كل ما يخصه و ابداء الراى فيما يخص هذا الشيىء و
هما اللى من حقهم ان يحافظوا عليه و يحموه و ينموه و يطوروه و يصلحوا مساره عند
اللزوم .
و الشىء اللى خلانى افكر فى الكلام ده هو
مقاله قريتها فى بريد الاهرام من كام يوم للدكتور علاء الدين القوصى و اللى كان
بيسال فيها السؤال ده ليجيب كل منا عن هذا السؤال من وجهة نظره .. و مع ان وجهة
نظر الكاتب ان البلد دى ملك لكل مصرى فانا راى عكس كده فى المضمون مش فى المعنى
يعنى انا زى ما قلت البلد دى فعلا المفروض انها ملك لاهلها من المصريين لكن الوضع
الفعلى غير كده .
لانك لو مشيت فى الشارع و قلت لحد من
الشارع بسيط و عادى انت يا جدع صاحب البلد دى ؟ هيقل طبعا دى بلدى و ارضها
ملكى وملك اهلى و جيرانى و صحابى و كل
الشعب البلد دى بتاعته.... لكن اساله,,,, طيب يا جدع انت تقدر تقول رايك فى اى موضوع
مهم يخص البلد دى .... هيقلك طبعا و اكيد مع انه ما يقدرش يقول بم فى اى حاجة تخص
بلده حتى و لو كان متعلم و ناضج لكنه هيقول اقدر..... خوفا من الحكومة و من
المسؤولين ... لكنه لو كان واحد من اصحاب السيارات العريضة و الجيوب العمرانة
بالورق الاخضر و الفيله اللى فى مارينا هيقولك البلد دى بلدى و اقدر اغير صنع
القرار فيها باشارة من صباعى الصغير و هيقول كده بالفم المليان لانه واثق من نفسه.
و الدليل على كلامى ان احنا كناس عاديين
لما نيجى نتكلم عن اى موضوع يخص بلدنا نقول دول هيعملوا كذا و كذا ....و دول
بيقولوا ان الحاجة دى المفروض تبقى كذا و كذا....
طيب ما حدش سال هما مين دول ؟ او هما مين
اللى بيقولوا؟
طيب ما حدش فكر امتى هنقول ( نحن ) او (
احنا ) هنعمل كذا و كذا....
ما تستغربوش و تقولوا هو انت هتغير
الكون؟ لا والله الكلام ده بيحصل
فى الدول المتقدمة او الدول اللى بنطلق
عليها الدول العظمى اليومين دول.
فى الدول دى اى قرار محلى يعنى يخص
الشؤون الداخلية للبلد كالتعليم او الصحة او الاسكان او غير كده بيحصل استفتاء
شعبى بسيط لاخذ راى الشعب فى قرار الحكومة فى اى مجال من المجالات السابقة و لا
يتم اخذ القرار الا بعد الاخذ براى الشعب صاحب تلك البلد من خلال ذلك الاستفتاء و
ده لانهم مقتنعين ان اى شىء يخص الشعب لازم قبل ما ينفذ يعرفوا راى الناس فيه ايه
من غير ما يفرضوه عليهم .
سنة سته ابتدائى رجعوها من غير ما يراعوا
هل الناس راضية و لا مش راضية .
الثانوية العامة اتلخبطت و المناهج
اتغيرت و اصبحت متاخرة ( يعنى اللى الطالب المصرى بيدرسه دلوقت كان بيتدرس بره من
خمسين سنة ) زى مانكون على بال مابيوصلنا العلم بتفوت خمسين سنة من التدنى فى
الثقافة و العلم عندنا .و كل ده من غير ما يسالوا اصحاب الشان من الشعب نفسه.
رفع الاسعار و العلاوات الوهمية اللى
بتبقى ملاليم و اللى مش عاجبه يخبط دماغه فى اكبر حيط.
لامتى هنقول ديموقراطية و حرية و نفضل
نغنيها و هيه شىء معدوم فى بلدنا.
كل يو م التصريحات الرنانة اللى على
السنة المسؤولين و الابتسامات الصفرا العريضة ( الايام اللى جاية معدوم الدخل
هيبقى بيلعب بالفلوس لعب) ( و الاسعار هترخص بس على المواطنين انهم يصبروا و
يطولوا نفسهم)
هما امتى يحسوا بالغلابة اللى نايمين فى
الشوارع فى البرد او تحت الشمس مش لاقيين ياكلوا.
انا فى
موقف حصلى من فترة لكن مش قادر انساه ,,,
كنت واقف مرة فى محل فول و طعمية
باجيب اكل و انا واقف فجاة لقيت واحد سنه فى حدود عشرين خمسة و عشرين سنة و
هدومه مبهدلة و دقنه طويلة. جايلى و بيقولى معاك و النبى جنيه قلتله ليه؟ قالى
اصلى جعان و مااكلتش من يومين . بصراحة انا خفت لحسن يكون شارب او متعاطى حاجة .
لكنه صعب عليا فاديتله الجنيه. و تابعته بنظرى علشان اشوفه هيعمل ايه بالجنيه رحت
لقيته جاب بيه سندوتش و قعد ياكله جمب المحل بشراهة زى مايكون كان هيموت من الجوع.
رحت على طول افتكرت الناس اللى معاها الملايين و
بيرموها يمين و شمال باسراف من غير احساس بالناس دى. و ناسيين كلمة سيدنا عمر بن
الخطاب رضى الله عنه اللى قال ( لو بغلة تعثرت فى العراق اخاف ان يسالنى الله
لماذا لم تمهد لها الطريق يا عمر؟) لا اله الا الله . ربنا يرحمك و يسكنك جنته
لانك خفت على البغلة انك تتسال قدام ربنا ليه ما سويتش الطريق ليها علشان تمشى. و
البنى ادم دلوقت بيشحت علشان ياكل لقمة حاف.
خواطر darsh_korpov
بسم الله الرحمن الرحيم
اتعودت دايما لما ابدأ كلامى مع نفسى
.... أبدأ بسؤال لنفسى و احاول اجاوب عليه واشوف هل اجابتى صح او لا و لو حسيت ان
اجابتى غلط عليه افكر فى الاجابة الصح و استفيد بيها.
طيب اى حد لو سمع كده ممكن يقول طيب هو
انت هتعرف منين انك الصح او انك فى اجابتك لنفسك غلطان.؟
الاجابة لو كانت فيها نوع من الخطا اكيد
نفسك مش هتقبلها و العكس,,,,,,, يعنى الشيىء الصح هو اللى نفسك اول ما تفكر فيه
هتحس براحة و اطمئنان و الشيىء الغلط هو اللى نفسك هتنقبض منه على طول.
الكلام ده طبعا لو كنت انت فعلا انسان
سوى...... لانك لو مش شخص سوى اكيد هتحصل
عندك لخبطه و خلط بين الصح و الغلط ,,,,,
هتشوف الصح غلط و الغلط صح,, علشان
كده انا سالت نفسى سؤال و المفروض فى رايى ان اى حد يساله لنفسه.
(هل انا انسان سوى؟)......
طيب فى الاول احب افكر,,,,,, يعنى ايه
كلمة سوى؟ من اللفظ بيتهيألى من غير ما
افتح المعجم و القاموس ان كلمة سوى جاية من كلمة
الاستواء يعنى الحاجة المستوية اللى مش مايلة ...
يعنى الشخص السوى هو الشخص اللى مش مايل
... و الميل ده اكيد معناه عيب شخصى بيخرجنى من الطريق المستوى.... لكن هلف و ادور
و اقول ان مفيش حد خالى من العيوب حتى نفسى!!!!
هل معنى كده ان مفيش شخص سوى؟ !!!!
لا فى ناس كتير اسوياء على الرغم من انهم
فيهم بعض العيوب الغير واضحة او العيوب البسيطة...
معنى كده ان الاسوياء بيتفاوتوا فى درجة
نضجهم وتغلبهم على عيوبهم ومحاولة اصلاحها....
طبيعة النفس البشرية دايما بترفض النقد
او اللوم... صح؟
لكن ليه ما اكونش انا اقوى من نفسى و
اقبل النقد او اللوم بصدر رحب؟ لكن بشرط....
ان النقد الموجه ده يكون بحدود و بدون
تطاول او قلة ذوق.
لو الشرط ده اتحقق يبقى اكيد النقد ده لو
فى محله هيفيدنى قوى فى انى احاول اتغلب على العيب ده و ما اسمحش لحد انه يلاقى
عندى ثغرة يقدر يهاجمنى او يلومنى منها.
فيه ناس كتير حواليا و ممكن اكون عايش
معاهم و ممكن يكونوا اقرب الناس ليا غير اسوياء سواء فى اهلى او من اصحابى او غيره
لكن مهما حاولت تقنعهم بعيوبهم بالذوق او بالهدوء صعب اقناعهم بكده لانهم متخيلين
انهم مثلا بحكم سنهم او مكانتهم ليس لى او لغيرى
الحق فى ان اتحدث معهم عن عيوبهم.. بل و بيعتبروا ان مجرد تذكيرهم بعيوبهم
يعتبر سبة او شتيمة حتى و لو كان الكلام بالذوق...
و الناس دول انسب طريقة للتعامل معاهم هى
التجاهل التام و عدم محاولة الاحتكاك بهم علشان ما يتحرقش دمى على الفاضى لكن
هتبقى فيه مشكلة تانية لو كان الشخص ده غير سوى و حشرى فى شؤون الاخرين و كثير
الكلام على الفاضى والمليان. اكيد ده هيكون افظع لكن برده علاجه هو البرود التام
وتجاهله لان برضه الكلام مع الشخص ده غير مجد مهما حصل....
طيب انت تعرف منين انك شخص سوى؟
لو حسيت ان الناس المحيطين بيك بيحبوك و
بيحبوا كلامك و بيحبوك كشخص مرح او مثقف او هادىء او مفكر او غيره و بيسالوا عنك
لمجرد السؤال عليك من غير ما يعوزوا منك خدمه او غيره فاكيد بدون شك انت شخص سوى
حتى و لو كان فيك عيوب بسيطة.
طيب هل الشخص السوى لما يرتبط باخرى غير
سوية ممكن يكون اولادهم زيهم؟
بنسبة 40%( النسبة دى فى اعتقادى انا)
ممكن يطلع اولادهم زيهم لكن ممكن ينتج منهم اولاد اكثر ذكاء و اكثر ثقة فى النفس و
اشخاص اسوياء عن ابوهم و امهم..
و فى النهاية اتمنى ان ربنا يرحمنى و
يبعدنى عن هؤلاء الناس غير الاسوياء و يبعد كل الناس عنهم و يهديهم علشان المجتمع
يرتاح من عقولهم المريضة..
خواطر darsh_korpov