الكرسي بين جمعة والصباحي

طبعاً اليومين دول في هوجة الانتخابات لازم أكتب عنها ، ولأنكم تعرفوا عني إني لساني فالت شوية ومبعرفش أسكت ولازم أتلامض وإلا مبقاش المصري اللي تعرفوه .

لذلك قلت أكتب عن المرشحين وعِند في بعض الناس مش هاكتب عن مرشح الحزب اللي أنا عضو فيه علشان محدش يتهمني بالتحيز أو استغلال موقعنا العزيز للدعاية الانتخابية ، وطبعاً إحترماً لمشاعر الغير مش هاقدر أذكر أسامي الناس اللي هاتكلم عنهم مع العلم إني هاتكلم المرة دي عن نعمان والصباحي وربنا يتمم بخير .

وإليكم البيان التالي :

1- شعللها ياولعة

اللي شاف وسمع ماشي ، واللي ماشافش يخللي حد يحكي له ، علي المصيبة السودا اللي حصلت ، مش عيب يادكتور لما تشتم واحد بيعبر عن رأيه ، وكمان تشتمه الشتيمة المهببة دي ، ده حتى فال وحش عليك ، وخطر علي مستقبلك العظيم في البلد ، علي كده لو وصلت للكرسي هاتبهدل الشعب شتيمه ، ومش بعيد تطلع علينا في التليفزيون كل يوم وتشتمنا – الشعلة معايا ياشعب ياولاد الـ.... – وأكيد طبعاً حاجات كتير هاتتغير زي أسامي الوزارات مثلاً ، يعني مش بعيد تخللي وزارة السياحة تبقي وزارة "القباحة" ولا وزارة التربية والتعليم تبقي وزارة قلة الرباية والتقطيم ، وأكيد طبعاً هاتغير الوزارة بوزرا جدد من المدبح وتكون مؤهلاتهم قاموس كامل متكامل من الشتيمة ووصلات الردح والتشويح بالإيدين .

عامة إنت فقدت إحترام وثقة ناس كتير ، وإبقي قابلني لو كسبت يادكتور ، يبقي شنبي علي نانسي عجرم لو شفت الكرسي يادك!!تووووووور .

2- صباح الطرابيش

قلبي معاك والنبي ، إيه بس اللي خلاك ترشح نفسك ، دي الرئاسة هم وغم ووجع قلب ، وإنت لسة ياحبة عيني في عز شبابك ، ده إنت ممكن تكبرلك تشعين شنة - قصدي تسعين سنة – في يومين رئاسة ياراجل ، ربنا يديك الصحة ياحاج

أنا عن نفسي بحب الطرابيش ، ونفسي ألبس طربوش ، بس يكون لونه أخضر وعليه علامة أديداس أو نايك Nike وأهي تبقي موضة ، وأكيد طبعاً هاتقعد كل الحريمات في البيوت ، وكل واحدة فيهم ماسكة في إيدها لمبة جاز ومستنية علي باب الدار لما السبع يشرف وتنقعه في مياه بملح – يبقي سبع مملح –

كمان مش بعيدة عليك – ما إنت قادر وتعملها – تلغي العربيات وترجع الحناطير تاني ، وطبعاً هاتلغي الموبايلات ووزارة الإتصالات ، كل ده ممكن تعمله حضرتك بس سؤال من فضلك

ممكن زي ما هاترجع الطربوش هاترجع الأسعار لنفس عهد الطرابيش ؟؟؟؟؟؟؟؟؟؟؟؟؟؟

سيبك من الكلام ده ياحاج ، ده إنت راجل بركة وسكرة وكُلك جدعنة ، كُلك ذوق – كُلك أدب – كُلك لقمة ونام والنبي .

أحمد المصري

elmasrydmx@yaho.com